من أين لك بهذا الحب والولاء يا صلاح

أنا بحب محمد صلاح من زمان، لكن من بعد ماتش الكونغو ومن بعد اللقطة دي حبي ليه زاد أضعاف

كتب /محمد السيد 

بلجيكا

بعد جول التعادل اللي جابته الكونغو في وقت قاتل بقى حلم المصريين في الوصول لكأس العالم مهدد، صلاح اترمى في الأرض من الصدمة وقام يصرخ ويخبط على وشه وبعدها بعد يشاور للجمهور يشجع ولزمايله يكملوا

تفتكروا أي لاعب ممكن يعوز يروح كاس العالم ليه؟

علشان يتشهر؟ صلاح مشهور طبيعي وقرب من لاعيبة المستوى الأول في العالم بمعني إن مفيش مسؤول عن أي نادي في أوروبا أو مشجع لأي نادي كبير ميعرفوش

علشان طمعان في مكافأة الصعود؟ صلاح ربنا يزيده مرتبه في شهر بإجمالي مكافآت الصعود للمنتخب بالكامل

علشان يسوّق نفسه؟ مش محتاج، الراجل بيلعب في أهم دوري في العالم وفي واحد من أعرق فرق العالم ودلوقتي خطوته الجاية المنتظرة ريال مدريد أو برشلونة من غير كاس عالم ولا حاجة

بحسابات العقل محمد صلاح المفروض يكون أقل واحد في مصر اهتماما بالصعود لكاس العالم، لكن الواقع بيقول إن رد فعله كان الأوضح بين كل اللي في الملعب، زيه زي أي واحد فينا عض في الأرض وخبط في الحيطان بعد جول التعادل

علشان كدة حبي لصلاح زاد.. علشان رغم كل اللي ربنا اداهوله لسة واحد مننا.. بيحب بلده وبيتعامل معاها كمشجع نفسه يشوفها في كاس العالم مش كلاعب نظريا مش هيفرق معاه يروح روسيا أو ميروحش.. علشان شايل المنتخب على كتافه وبييجي يموّت نفسه في كل ماتش مش بيخاف على رجله زي ما كان قبل كدة لاعيبة بتلعب في فرق متوسطة في تركيا تيجي تلعب مع المنتخب بالشوكة والسكينة ده إذا جم أصلا ومبعتوش تقرير طبي إنهم مصابين.. صلاح بيحب بلده وبيحبنا وبيحب يفرحنا علشان كدة طبيعي نحبه ونحب أي حاجة تفرّحه 🙂

عن aboeltayb

اضف رد

لن يتم نشر البريد الإلكتروني . الحقول المطلوبة مشار لها بـ *

*