ملاحق

نصائح هامة للمسافرين روسيا لتشجيع منتخب مصر

مواقف تقابلك فى روسيا

================

– المصريين اللي هيروحوا يشجعوالمنتخب في كاس العالم اليكم بعض النصائح التالية

* الروس مش بيحبوا يتكلموا انجليزي يعني محدش هيفهمك ولا انت هتفهم حد

* اعمل اي حاجة في روسيا الا الاغتصاب و المخدرات و الارهاب

* في روسيا ممنوع التدخين في الاماكن المقفولة و في الحدائق العامة و محطات الاوتوبيسات في الشارع

* لو هتمشي تتكلم بصوت عالي و تضحك بصوت عالي في الشارع هيبصولك بقرف

* لو بصيت على واحدة و تنحت ممكن تقولك بتبص على ايه و ممكن تتخانق معاك

* الروس عصبيين جدآ وعندهم استعداد للأشتباك  و المشاجرة في اي وقت و مكان

* الجو شهر 6 في روسيا بيبقى عامل زي اخر اسبوعين في مارس بتاع مصر و ممطر

* ابوس ايدك بلاش تحرش

* ضابط الجوازات في المطار من حقه يرفض دخولك البلد بدون اي سبب،، و بتحصل كتير اوي اوي اليومين دول

* ممنوع السير في الشارع و انت شايل في ايدك ازازة خمرة و ماشي بتشرب منها و بتعربد

* في روسيا محلات السلاح اكتر من مطاعم ماكدونالدز و غالبية الشباب معاهم سلاح ابيض او مسدس بيضرب بلي بيعور و شايلين السلاح بالتصريح بتاعه عادي خالص

* حاول متغيرش فلوس غير في البنك او مكاتب الصرافة و خلي بالك الفلوس المضروبة كتيرة هنا

* نسبة كبيرة من الروس نزلوا مصر و داقوا حوارات المصريين

* بلاش معاكسات ارجوك و خليك واجهة حضارية لبلدك

* هتعدي الشارع بص على الاشارة و متعديش غير في اشارتك علشان لو اتمسكت هتدفع غرامة

* كل محطة اوتوبيس بيبقى متعلق فيها يافطة مكتوب فيها ارقام الاوتوبيسات اللي بتعدي عليها و مواعيدها

* روسيا فيها كاميرات في الشوارع و المحلات و مداخل البيوت و المولات و العمارات و كل مكان

* باسبورك زي جلدك ماتروحش في حته من غيره هو  و الورقة الصغيرة اللي هتاخدها من ظابط الجوازات في المطار اسمها ايميجراسيونا كارتا هتسلمها تاني في المطار و انت مغادر

* باسبورك لو ضاع تتوجه لأقرب قسم شرطة و تعمل محضر و بعدين تتوجه للقنصلية و تشوف هيعملوا ايه معاك

* موسكو فيها شبكة مترو انفاق كبيرة جداً و كلها تحف معمارية من ثلاثينات القرن اللي فات و بيسموها قصور الشعب حوالي 14 خط مغطية العاصمة كلها حاول متتحركش جواها لوحدك و انت لسه جديد علشان هتتوه

* حالياً الجنيه عامل حوالي 3.6 روبيل و متفتكرش ان فرق الارقام ده معناه انها دولة فقيرة . لو قعدت في مطعم و اكلت و شربت و اتبسطت مش هتدفع اقل من 1000 روبيل

* روسيا في الصيف جميلة جداً و اللون الاخضر يسر العين

* موسكو من اغلى العواصم في العالم اعمل حسابك في فلوس كتيرة

* هتكسر فيزة هتعيش زي المطاريد او هتتمسك و هتروح محكمة و هتاخد ورقة طرد لازم تغادر خلال 10 ايام و هتاخد ختم حرمان 5 سنين

* معظم المحلات و المولات و المطاعم و الصيدليات بتقفل من 10 مساء ماعدا محلات الورد 24 شغالين

* حاول تعرف كام كلمة روسي علشان تعرف تتعامل هنا

* اول ما تقوم من النوم اعرف الطقس ظروفه ايه علشان هتلاقي شمس و هوا و سحاب و برق و رعلىعد في يوم واحد و لازم يبقى معاك شمسية و الا هتغرق بجد

* عادي اوي ان حد يوقفك و يشحت منك سيجارة

* لما المترو يقف حضرتك تقف على جنب لحد ما الركاب  ينزلوا و بعدين تركب

و تمنياتنا لكم برحلة سعيدة و نتمنى جميعا الفوز لمنتخب مصر فى روسيا

من جروب مشجعى منتخب مصر فى روسيا

بقلم عم / هشام السيد

روسيا / موسكو

اظهر المزيد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق